पुणे : फेडरेशन ऑफ इंडियन चेंबर ऑफ कॉमर्स अँड इंडस्ट्रीजच्या लेडीज ऑर्गनायझेशन अर्थात ‘फिक्की फ्लो’ संस्थेच्या वतीने ब्रिजस्टोन, टाटा स्ट्राइव्ह यांच्या सहकार्याने ५० युवतींना रिटेल सेल्स असिस्टंट कौशल्याचे प्रशिक्षण देण्यात आले. त्यापैकी २५ मुलींना नोकरीही मिळाली आहे.
या प्रशिक्षण उपक्रमांतर्गत रिटेल मॅनेजमेंटमधील प्रशिक्षणासाठी गेल्या वर्षीपासून भरघोस निधीची तरतूद केली जात आहे. या अभ्यासक्रमात सर्व सहभागी मुलींना विविध विषयांचे धडे देण्यात आले. नऊ आठवड्यांचे क्लासरूम प्रशिक्षण व एका आठवड्याचे प्रत्यक्ष नोकरीचे प्रशिक्षण देण्यात आले. रिटेल स्टोअर आणि मर्चंडाइज डोमेन याचे प्रशिक्षण दिले गेले. व्यावसायिक विकासाबद्दल मार्गदर्शन, सॉफ्टस्किल, संवादकौशल्य, अर्थसाक्षरता आदी गोष्टींचाही या प्रशिक्षणामध्ये समावेश होता. प्रत्यक्ष अनुभव मिळावा यासाठी त्यांना दुकानात काम करण्याची संधीही देण्यात आली. यातील २५ युवतींना वेगवेगळ्या रिटेल स्टोअर्समध्ये नोकरी मिळाली असून, उर्वरित २५ जणींना सहा आठवड्यांचे प्रशिक्षण पूर्ण झाल्यानंतर नोकरी दिली जाणार आहे.
प्रशिक्षण पूर्ण केलेल्या युवतींना दापोडी येथील टाटा स्ट्राइव्ह व्यावसायिक केंद्रात आयोजित केलेल्या कार्यक्रमात प्रमाणपत्र प्रदान करण्यात आले. या कार्यक्रमाला ‘फिक्की फ्लो’च्या चेअरपर्सन रितु छाब्रिया, वरिष्ठ उपाध्यक्ष अनीता सणस, कोषाध्यक्ष अनिता अग्रवाल, अजय सेवेकरी, पराग जैन, ब्रिजस्टोनचे रानू कुलश्रेष्ठ, टाटा स्ट्राइव्हचे सदस्य उपस्थित होते.
महिलांना कौशल्य प्रशिक्षण देऊन सक्षम करण्याचे काम ‘फिक्की फ्लो’च्या माध्यमातून केले जाते. यासाठी विविध उपक्रम राबविले जात असून, त्या माध्यमातून हजारो युवतींना प्रशिक्षण दिले जात आहे. महिलांना पुरुषांइतक्याच संधी मिळाव्यात, या दृष्टीने ‘फिक्की फ्लो’ आणि ब्रिजस्टोन प्रयत्नशील आहे. त्यासाठी सीएसआर निधीमधून विविध मार्गदर्शन सत्रांचे आयोजन केले आहे.
‘‘फिक्की फ्लो’ पुणे चॅप्टरने गेल्या पाच वर्षांत ४६२ सदस्य जोडत महिलांसाठी विविध उपक्रम राबवले आहेत. ‘शिक्षण, कौशल्य प्रशिक्षण, ज्येष्ठ नागरिक सेवा, आदी उपक्रम सुरू आहेत,’ असे रितू छाब्रिया यांनी सांगितले.